Social Media Ne Romance Ko Kya Kar Diya?

Kabhi pyaar ka matlab intezaar hota tha. Ek kagaz ka tukda, jisme likhe hue lafzon me dhadkan chhupi hoti thi. Jab koi love letter milta tha na, toh pehle uski handwriting dekhi jaati thi, phir dheere dheere har line padhi jaati thi, aur har shabd me ek ehsaas mehsoos hota tha. Kagaz par girte hue shabd sirf ink nahi hote the, woh kisi ka waqt, kisi ki himmat aur kisi ka sach hote the. 

Log apni family ke baare me batate the, apne sapne likhte the, apni pareshaani share karte the. Dil khol kar likhte the, kyunki us waqt darr kam aur jazba zyada hota tha. Haan, risk alag tha  agar mummy ya daddy ke haath letter lag gaya toh khair nahi, aur agar chhote bhai-behen ko mil gaya toh chocolate ya thoda paisa dekar mamla sambhalna padta tha par phir bhi usme ek sachchai thi, ek masoomiyat thi.

Phir dheere dheere waqt badla, aur pyaar haath se likhne se typing par aa gaya. Main jab high school me relationship me aayi, tab letters ka daur lagbhag khatam ho chuka tha, Facebook ka time tha. Ek hi device, ek hi screen, login chhod nahi sakte the, isliye main apni copy me email id aur password likh kar rakhti thi, kyunki mere bhai-behen mujhse zyada tez the. Notification aata tha toh dil tez dhadakta tha, par saath hi ek ajeeb sa doubt bhi hota tha , jo message aa raha hai, kya woh usne khud type kiya hai, ya uske peeche koi aur bhi baitha hai? Aaj ke pyaar me yahi sabse bada farq hai hum online hote hue bhi sure nahi hote ki saamne wala kitna real hai.

Maine kabhi khud love letter nahi likha, na hi kabhi mujhe koi mila, lekin main love letters deliver zaroor karti thi. Meri best friend ka boyfriend mujhe chhupke se letter deta tha aur kehta tha, “please usko de dena.” Kabhi letter ke saath chocolate hoti thi, kabhi gift pack jisme kya hota tha pata nahi, par us chhoti si responsibility me bhi ek excitement hoti thi. Woh daur slow tha, par gehra tha. Aaj sab kuch fast hai  instant love, instant proposal, instant breakup. Jaise hi koi better option dikha, choice change. Jaise hi reply late ho gaya, doubt shuru. Jaise hi story kisi aur ke saath daali, insecurity shuru.

Pehle pyaar me log baat karte the, aaj log status show karte hain. Pehle ek dusre ko samajhne ki koshish hoti thi, aaj ek dusre ko display karne ki. Pehle ek letter mahino tak sambhal kar rakha jaata tha, aaj ek chat do second me delete ho jaati hai. Aur sabse bada farq yeh hai ki aaj hum bolte kam hain, sochte zyada hain  “agar maine isko apne ghar ke baare me bata diya toh kal ko yeh mere khilaaf use na ho jaye,” “agar maine apni weakness share kar di toh kahin yeh mujhe hurt na kar de.” Trust ki jagah thoda sa darr aa gaya hai, aur intimacy ki jagah thoda sa calculation.

Valentine week ka school wala scene yaad hai chhup chhup ke rose dena, teacher ki warning, friends ki teasing, aur dil ka zor zor se dhadakna. Woh sab public nahi tha, par real tha. Aaj Valentine week trend karta hai, tab woh feel hota tha. Aaj pyaar stories me zyada dikhai deta hai, tab aankhon me dikhta tha.

Par shayad problem social media nahi hai, problem speed hai. Pyaar ko humne bhi fast bana diya. Pehle intezaar me sukoon tha, aaj delay me frustration hai. Pehle ek jawab ke liye din lag jaate the, aaj “typing…” dekh kar bhi sabr nahi hota. Romance mara nahi hai, bas digital ho gaya hai. Sawal yeh nahi ki social media ne romance ko khatam kiya ya nahi, sawal yeh hai ki kya hum ab bhi utni hi sachchai se pyaar karte hain jitni pehle log kagaz par likh kar karte the.

Shayad aaj bhi koi kahin baitha hoga jo haath se letter likhta hoga. Shayad aaj bhi koi chat me sach bolta hoga. Medium badal gaya hai, par agar dil ab bhi sachcha hai, toh romance ab bhi zinda hai. Bas hume screen ke peeche se thoda sa asli hona padega. ❤️